Vorum við svo heppnir að fá upplýsingar um fyrsta líffrænt ræktaða bjórinn á Íslandi sem Víking Ölgerð hefur nú sett á markað og fagnar Bjórspjall.is þeirri þróun og vonum við að þeim vegni sem allra best með þessa kærkomnu nýjung. Við óskum þeim til hamingju með þennan árangur og vonum að þessi þróun sem hefur átt sér stað haldi áfram og við fáum að sjá meira af svona frumlegum nýjungum.

Hér fyrir neðan má sjá greinina sem Víking ölgerð sendi frá sér. Einnig er hægt að lesa greinina hér.

Fyrsti íslenski lífræni bjórinn

Nú fyrr í sumar fékk Víking Ölgerð á Akureyri fyrst íslenskra ölgerða lífræna vottun frá vottunarstöðinni Tún.  Vottunin hefur mikið gildi fyrir Víking Ölgerð sem nú hefur framleitt fyrsta íslenska bjórinn þar sem eingöngu eru notuð bestu fáanlegu lífrænt ræktuðu hráefni auk þess sem framleiðsluferlið hefur verið vottað af fagaðilum.  Lífrænar aðferðir draga úr hættu á ýmiskonar mengun í matvælum enda kornið framleitt án eiturefna og tilbúins áburðar.

Bjórinn er bruggaður eftir hefðum frá Pilsen í Tékklandi og ber nafnið Pils Organic.  Bjórinn er ljós á litinn og í hann er notað mikið af humlum sem gefur bæði gott bragð og lykt ásamt sérstöku eftirbragði.  Bruggmeistarinn Baldur Kárason á heiðurinn af þessum nýja bjór sem eflaust á eftir að verða vel tekið.  Pils Organic er eingöngu seldur í glerflöskum og er fáanlegur í Vínbúðum í Kringlunni, Skútuvogi og Heiðrúnu við Stuðlaháls, auk þess sem hann er fáanlegur á betri veitingastöðum og börum um allt land.

Víking Ölgerð á Akureyri fer ótroðnar slóðir þegar kemur að vörulínunni Íslenskur úrvals, en Pils Organic er annar bjórinn undir þessari línu.  Fyrsti bjórinn var Stout sem einnig var fyrsti Stout sem framleiddur hafði verið á Íslandi.  Nú er Stout fáanlegur í fjölmörgum Vínbúðum og veitingastöðum bæði í glerflöskum og á krana.

(Á meðfylgjandi mynd sést Gunnar Á. Gunnarsson framkvæmdastjóri Túns afhenda Baldri Kárasyni Bruggmeistara vottorðið frá Túni)”

Skilja eftir athugarsemd

Please enter your comment!
Please enter your name here

*

This site uses Akismet to reduce spam. Learn how your comment data is processed.